manzil-e-mehr-o-wafa ki rahnumai ho gai

manzil-e-mehr-o-vafā kī rahnumā.ī ho ga.ī

jab milī tum se to ḳhud se āshnā.ī ho ga.ī

sāmne dil aa gayā to saare manzar jal uThe

ā.ina-ḳhāne meñ rasm-e-ḳhud-numā.ī ho ga.ī

maiñ 'urūj-e-bandagī ko naam de dūñgī agar

un ke dar tak mere sajdoñ kī rasā.ī ho ga.ī

ek lamhe ke liye gum ho agar un kā ḳhayāl

maiñ ye samjhūñgī ki mujh se bevafā.ī ho ga.ī

zo'm zāhid ko bahut thā pārsā.ī par magar

ik ishāre se shikast-e-pārsā.ī ho ga.ī

zulm bhī us ne kiyā aur ban gayā mazlūm bhī

kyā gavāh us shaḳhs kī saarī ḳhudā.ī ho ga.ī

ik milan-rut aa.ī thī mere liye lekin 'bahār'

is fazā meñ daf'atan shām-e-judā.ī ho ga.ī

manzil-e-mehr-o-wafa ki rahnumai ho gai

jab mili tum se to KHud se aashnai ho gai

samne dil aa gaya to sare manzar jal uThe

aaina-KHane mein rasm-e-KHud-numai ho gai

main 'uruj-e-bandagi ko nam de dungi agar

un ke dar tak mere sajdon ki rasai ho gai

ek lamhe ke liye gum ho agar un ka KHayal

main ye samjhungi ki mujh se bewafai ho gai

zo'm zahid ko bahut tha parsai par magar

ek ishaare se shikast-e-parsai ho gai

zulm bhi us ne kiya aur ban gaya mazlum bhi

kya gawah us shaKHs ki sari KHudai ho gai

ek milan-rut aai thi mere liye lekin 'bahaar'

is faza mein daf'atan sham-e-judai ho gai