منزل ہے دور کوچ کا سامان کیجیے

منزل ہے دور کوچ کا سامان کیجیے

دشوار ہے سفر اسے آسان کیجیے

یہ عقل کی ہے بات اسے مان لیجیے

جینا ہے تو سماج سے پیمان کیجیے

کسب کمال فن کا ہے یہ اولیں چلن

ہر آن اپنے آپ کو قربان کیجیے

ارشاد ہے یہ غالب دانائے راز کا

پندار کا صنم کدہ ویران کیجیے

میرا جنوں ہی کوئے ملامت کی جان ہے

میرے فسون شوق کو پہچان لیجیے

رنگ ملال کو نہیں کیف نشاط کو

افسانۂ حیات کا عنوان کیجیے

شاید گداز عشق سے ہو جائے آشنا

ناصح کی نذر میرؔ کا دیوان کیجیے

کہتی ہے رمز و راز سے اس کی نگاہ ناز

مجھ پر نثار مذہب و ایمان کیجیے

آہنگ و رنگ کفر ہے اس کی متاع شوق

اردو کو بخشئے نہ مسلمان کیجیے

خوئے وفا میں ہو وہ عزیمت کا بانکپن

رسم جفا سے ان کو پشیمان کیجیے

دنیا دنی ہے ہر سگ دنیا کے سامنے

کیوں اپنے سوز عشق کا اعلان کیجیے

انساں کی ہست و بود کا ہے اور کیا جواز

اپنی نمود سے اسے حیران کیجیے

طرفہ ستم اگر کہ ہو شیطان حکمراں

ہے مصلحت کہ طاعت شیطان کیجیے

ہم معنیٔ ستم ہے یہ تمکیں نما کرم

احساں نہ کیجیے یہی احسان کیجیے

کیا مرد بے نیاز کو اعزاز کی ہوس

میرے لیے نہ دل کو پریشان کیجیے