manzil hai dur kuch ka saman kijiye

manzil hai duur kuuch kā sāmān kījiye

dushvār hai safar ise āsān kījiye

ye ‘aql kī hai baat ise maan lījiye

jiinā hai to samāj se paimān kījiye

kasb-e-kamāl-e-fan kā hai ye avvalīñ chalan

har aan apne aap ko qurbān kījiye

irshād hai ye ġhālib-e-dānā-e-rāz kā

pindār kā sanam-kada vīrān kījiye

merā junūñ hī kū-e-malāmat kī jaan hai

mere fusūn-e-shauq ko pahchān lījiye

rang-e-malāl ko nahīñ kaif-e-nashāt ko

afsāna-e-hayāt kā ‘unvān kījiye

shāyad gudāz-e-‘ishq se ho jaa.e āshnā

nāseh kī nazr 'mīr' kā dīvān kījiye

kahtī hai ramz-o-rāz se us kī nigāh-e-nāz

mujh par nisār maz.hab-o-īmān kījiye

āhang-o-rang-e-kufr hai is kī matā-e-shauq

urdu ko baḳhshiye na musalmān kījiye

ḳhū-e-vafā meñ ho vo azīmat kā bāñkpan

rasm-e-jafā se un ko pashemān kījiye

duniyā danī hai har sag-e-duniyā ke sāmne

kyoñ apne soz-e-ishq kā e'lān kījiye

insāñ kī hast-o-būd kā hai aur kyā javāz

apnī numūd se ise hairān kījiye

turfa-sitam agar ki ho shaitān hukmarāñ

hai maslahat ki tā’at-e-shaitān kījiye

ham-mā’nī-e-sitam hai ye tamkīñ-numā karam

ehsāñ na kījiye yahī ehsān kījiye

kyā mard-e-be-niyāz ko e’zāz kī havas

mere liye na dil ko pareshān kījiye

manzil hai dur kuch ka saman kijiye

dushwar hai safar ise aasan kijiye

ye ‘aql ki hai baat ise man lijiye

jina hai to samaj se paiman kijiye

kasb-e-kamal-e-fan ka hai ye awwalin chalan

har aan apne aap ko qurban kijiye

irshad hai ye ghaalib-e-dana-e-raaz ka

pindar ka sanam-kada viran kijiye

mera junun hi ku-e-malamat ki jaan hai

mere fusun-e-shauq ko pahchan lijiye

rang-e-malal ko nahin kaif-e-nashat ko

afsana-e-hayat ka ‘unwan kijiye

shayad gudaz-e-‘ishq se ho jae aashna

naseh ki nazr 'mir' ka diwan kijiye

kahti hai ramz-o-raaz se us ki nigah-e-naz

mujh par nisar mazhab-o-iman kijiye

aahang-o-rang-e-kufr hai is ki mata-e-shauq

urdu ko baKHshiye na musalman kijiye

KHu-e-wafa mein ho wo azimat ka bankpan

rasm-e-jafa se un ko pasheman kijiye

duniya dani hai har sag-e-duniya ke samne

kyon apne soz-e-ishq ka e'lan kijiye

insan ki hast-o-bud ka hai aur kya jawaz

apni numud se ise hairan kijiye

turfa-sitam agar ki ho shaitan hukmaran

hai maslahat ki ta’at-e-shaitan kijiye

ham-ma’ni-e-sitam hai ye tamkin-numa karam

ehsan na kijiye yahi ehsan kijiye

kya mard-e-be-niyaz ko e’zaz ki hawas

mere liye na dil ko pareshan kijiye