manzil ho koi zauq-e-safar apni jagah hai

manzil ho koī zauq-e-safar apnī jagah hai

ham apnī jagah rāhguzar apnī jagah hai

ye bhī to ġhanīmat hai ki ham zinda haiñ ab tak

is shahr-e-fasādāt meñ ghar apnī jagah hai

tanqīd kā darvāza bahar-hāl khulā hai

har da.avā-e-arbāb-e-hunar apnī jagah hai

har bazm meñ lāzim hī sahī baiThnā uThnā

is kā bhī ta.ayyun ho kidhar apnī jagah hai

kyā faisla kar jā.egā achchhe kā bure kā

har shaḳhs kā meyār-e-nazar apnī jagah hai

aa jaa.eñ kisī moḌ pe hālāt bashar ke

kuchh bhī sahī ehsās magar apnī jagah hai

ham apnī ravish ko kabhī 'iqbāl' na badleñ

nekī kā hai jo ajr magar apnī jagah hai

manzil ho koi zauq-e-safar apni jagah hai

hum apni jagah rahguzar apni jagah hai

ye bhi to ghanimat hai ki hum zinda hain ab tak

is shahr-e-fasadat mein ghar apni jagah hai

tanqid ka darwaza bahar-haal khula hai

har dawa-e-arbab-e-hunar apni jagah hai

har bazm mein lazim hi sahi baiThna uThna

is ka bhi tayyun ho kidhar apni jagah hai

kya faisla kar jaega achchhe ka bure ka

har shaKHs ka meyar-e-nazar apni jagah hai

aa jaen kisi moD pe haalat bashar ke

kuchh bhi sahi ehsas magar apni jagah hai

hum apni rawish ko kabhi 'iqbaal' na badlen

neki ka hai jo ajr magar apni jagah hai