manzil kahan hai dur talak raste hain yar

manzil kahāñ hai duur talak rāste haiñ yaar

kis justujū meñ ḳhvāb ke ye qāfile haiñ yaar

pal pal badaltā rahtā hai tahzīb kā mizāj

lamhoñ kī dastaras meñ ajab silsile haiñ yaar

hai sābiqa hazār marāhil se aur phir

is zindagī ke ba.ad bhī kuchh marhale haiñ yaar

tū hī batā tujhe maiñ rakhūñ kis shumār meñ

achchhe-bure sabhī se mire rābte haiñ yaar

haañ tujh se bevafā.ī kī ummīd to nahīñ

par sach kahūñ to dil meñ ka.ī vāhime haiñ yaar

ḳhvāhish kā ehtirām hai jazboñ kī aañch bhī

nīñdoñ kā ehtimām hai aur ratjage haiñ yaar

nazmeñ kahāñ haiñ falsafe manzūm haiñ tamām

ġhazleñ kahāñ haiñ ishq ke sab marsiye haiñ yaar

ahbāb rishte-dār sabhī mumbai meñ haiñ

lekin diloñ ke beach baḌe fāsle haiñ yaar

manzil kahan hai dur talak raste hain yar

kis justuju mein KHwab ke ye qafile hain yar

pal pal badalta rahta hai tahzib ka mizaj

lamhon ki dastaras mein ajab silsile hain yar

hai sabiqa hazar marahil se aur phir

is zindagi ke baad bhi kuchh marhale hain yar

tu hi bata tujhe main rakhun kis shumar mein

achchhe-bure sabhi se mere rabte hain yar

han tujh se bewafai ki ummid to nahin

par sach kahun to dil mein kai wahime hain yar

KHwahish ka ehtiram hai jazbon ki aanch bhi

nindon ka ehtimam hai aur ratjage hain yar

nazmen kahan hain falsafe manzum hain tamam

ghazlen kahan hain ishq ke sab marsiye hain yar

ahbab rishte-dar sabhi mumbai mein hain

lekin dilon ke beach baDe fasle hain yar