منزل کو ڈھونڈھنا ہے تو اپنی نظر میں ڈھونڈ

منزل کو ڈھونڈھنا ہے تو اپنی نظر میں ڈھونڈ

یا مفلسوں کی بھیگی ہوئی چشم تر میں ڈھونڈ

غم اور خوشی میں فاصلہ گر ڈھونڈھتا ہے تو

راتوں کے گھپ اندھیرے میں نور سحر میں ڈھونڈ

وہ کون ہے جو کرتا ہے شاخوں کو بارور

اس کا سراغ پھول میں برگ و شجر میں ڈھونڈ

یہ زندگی ملے گی لہو ہی میں تر بہ تر

امن و اماں میں ڈھونڈ کہ خوف و خطر میں ڈھونڈ

اشکوں کی موج یم میں تو کشتی چلا کے دیکھ

وہ ہر جگہ ملے گا اسے بحر و بر میں ڈھونڈ

رہبر کے انتظار میں محشرؔ ہے کس لئے

منزل کا اپنی راستہ گرد سفر میں ڈھونڈ