manzil ko DhunDhna hai to apni nazar mein DhunD

manzil ko DhūñDhnā hai to apnī nazar meñ DhūñD

yā muflisoñ kī bhīgī huī chashm-e-tar meñ DhūñD

ġham aur ḳhushī meñ fāsla gar DhūñDhtā hai tū

rātoñ ke ghup añdhere meñ nūr-e-sahar meñ DhūñD

vo kaun hai jo kartā hai shāḳhoñ ko bārvar

us kā surāġh phuul meñ barg-o-shajar meñ DhūñD

ye zindagī milegī lahū hī meñ tar-ba-tar

amn-o-amāñ meñ DhūñD ki ḳhauf-o-ḳhatar meñ DhūñD

ashkoñ kī mauj-e-yam meñ tū kashtī chalā ke dekh

vo har jagah milegā use bahr-o-bar meñ DhūñD

rahbar ke intizār meñ 'mahshar' hai kis liye

manzil kā apnī rāsta gard-e-safar meñ DhūñD

manzil ko DhunDhna hai to apni nazar mein DhunD

ya muflison ki bhigi hui chashm-e-tar mein DhunD

gham aur KHushi mein fasla gar DhunDhta hai tu

raaton ke ghup andhere mein nur-e-sahar mein DhunD

wo kaun hai jo karta hai shaKHon ko barwar

us ka suragh phul mein barg-o-shajar mein DhunD

ye zindagi milegi lahu hi mein tar-ba-tar

amn-o-aman mein DhunD ki KHauf-o-KHatar mein DhunD

ashkon ki mauj-e-yam mein tu kashti chala ke dekh

wo har jagah milega use bahr-o-bar mein DhunD

rahbar ke intizar mein 'mahshar' hai kis liye

manzil ka apni rasta gard-e-safar mein DhunD