manzil pe pahunchne ka mujhe shauq hua tez

manzil pe pahuñchne kā mujhe shauq huā tez

rasta milā dushvār to maiñ aur chalā tez

hāthoñ ko Dubo aa.e ho tum kis ke lahū meñ

pahle to kabhī itnā na thā rañg-e-hinā tez

mujh ko ye nadāmat hai ki maiñ saḳht-gulū thā

tujh se ye shikāyat hai ki ḳhanjar na kiyā tez

chal maiñ tujhe raftār kā andāz sikhā duuñ

ham-rāh mire sust-qadam mujh se judā tez

afsurdagi-e-gul pe bharīñ kis ne ye aa.heñ

chaltī hai sar-e-sahn-e-chaman aaj havā tez

ab mujh ko nazar pher ke ik jaam de saaqī

phir kaun sambhālegā agar nashsha huā tez

insān ke har ġham pe 'sabā' choT lagī hai

shīshe ke chaTaḳhne kī bhī thī kitnī sadā tez

manzil pe pahunchne ka mujhe shauq hua tez

rasta mila dushwar to main aur chala tez

hathon ko Dubo aae ho tum kis ke lahu mein

pahle to kabhi itna na tha rang-e-hina tez

mujh ko ye nadamat hai ki main saKHt-gulu tha

tujh se ye shikayat hai ki KHanjar na kiya tez

chal main tujhe raftar ka andaz sikha dun

ham-rah mere sust-qadam mujh se juda tez

afsurdagi-e-gul pe bharin kis ne ye aahen

chalti hai sar-e-sahn-e-chaman aaj hawa tez

ab mujh ko nazar pher ke ek jam de saqi

phir kaun sambhaalega agar nashsha hua tez

insan ke har gham pe 'saba' choT lagi hai

shishe ke chaTaKHne ki bhi thi kitni sada tez