manzilen aur bhi hain wahm-o-guman se aage

manzileñ aur bhī haiñ vahm-o-gumāñ se aage

ham ko karnā hai safar qaid-e-makāñ se aage

paikar-e-sher ko malbūs atā kyā kiije

jab taḳhayyul kī ho parvāz bayāñ se aage

aab aur ḳhaak kī ye bazm hameñ kyā raas aatī

ham ko jaanā thā sitāroñ ke jahāñ se aage

kab talak dair-o-haram kī ye hadīs-e-be-sūd

mas.ale aur haiñ nāqūs-o-azāñ se aage

justujū aur hai kuchh ahl-e-junūñ kī varna

kaun kartā hai safar jā-e-amāñ se aage

karb ko apne tamāsha na banāyā jaa.e

hai adab-gāh-e-vafā āh-o-fuġhāñ se aage

nazr-e-andesha na ho jaa.e kahīñ ziist 'obaid'

baat kuchh aur kareñ sūd-o-ziyāñ se aage

manzilen aur bhi hain wahm-o-guman se aage

hum ko karna hai safar qaid-e-makan se aage

paikar-e-sher ko malbus ata kya kije

jab taKHayyul ki ho parwaz bayan se aage

aab aur KHak ki ye bazm hamein kya ras aati

hum ko jaana tha sitaron ke jahan se aage

kab talak dair-o-haram ki ye hadis-e-be-sud

masale aur hain naqus-o-azan se aage

justuju aur hai kuchh ahl-e-junun ki warna

kaun karta hai safar ja-e-aman se aage

karb ko apne tamasha na banaya jae

hai adab-gah-e-wafa aah-o-fughan se aage

nazr-e-andesha na ho jae kahin zist 'obaid'

baat kuchh aur karen sud-o-ziyan se aage