manzilen dur hain aur aabla-pai apni

manzileñ duur haiñ aur ābla-pā.ī apnī

kaise mumkin ho tire shahr rasā.ī apnī

maiñ tirā naam qabīle meñ jo letā huuñ kabhī

har koī jhāḌne lagtā hai ḳhudā.ī apnī

ek vo thā ki vo jirge meñ bhī ḳhāmosh na thā

ek ham the ki na de paa.e safā.ī apnī

ab to ye haq bhī nahīñ hai use chāhā jaa.e

ab to ye ziist bhī lagtī hai parā.ī apnī

'ishq kahte haiñ jise hai dar-e-yazdāñ kā charāġh

aur isī 'ishq meñ duniyā hai samā.ī apnī

mil ga.ī hijr kī sauġhāt hameñ bhī āḳhir

jaane ab kaise kaTegī mire bhaa.ī apnī

ye mohabbat hai mohabbat hai mohabbat jo 'samar'

'umr-bhar kī hai yahī nek kamā.ī apnī

manzilen dur hain aur aabla-pai apni

kaise mumkin ho tere shahr rasai apni

main tera nam qabile mein jo leta hun kabhi

har koi jhaDne lagta hai KHudai apni

ek wo tha ki wo jirge mein bhi KHamosh na tha

ek hum the ki na de pae safai apni

ab to ye haq bhi nahin hai use chaha jae

ab to ye zist bhi lagti hai parai apni

'ishq kahte hain jise hai dar-e-yazdan ka charagh

aur isi 'ishq mein duniya hai samai apni

mil gai hijr ki saughat hamein bhi aaKHir

jaane ab kaise kaTegi mere bhai apni

ye mohabbat hai mohabbat hai mohabbat jo 'samar'

'umr-bhar ki hai yahi nek kamai apni