manzilon ke fasle diwar-o-dar mein rah gae

manziloñ ke fāsle dīvār-o-dar meñ rah ga.e

kyā safar thā mere saare ḳhvāb ghar meñ rah ga.e

ab koī tasvīr bhī apnī jagah qaa.em nahīñ

ab havā ke rañg hī merī nazar meñ rah ga.e

jitne manzar the mire ham-rāh ghar tak aa.e haiñ

aur pas-e-manzar savād-e-rah-guzar meñ rah ga.e

apne qadmoñ ke nishāñ bhī band kamroñ meñ rahe

tāqchoñ par bhī diye ḳhālī nagar meñ rah ga.e

kar ga.ī hai naam se ġhāfil hameñ apnī shanāḳht

sirf āvāzoñ ke saa.e hī ḳhabar meñ rah ga.e

nā-ḳhudāoñ ne palaT kar jaane kyuuñ dekhā nahīñ

kashtiyoñ ke to ka.ī taḳhte bhañvar meñ rah ga.e

kaisī kaisī āhaTeñ alfāz kā paikar banīñ

kaise kaise aks merī chashm-e-tar meñ rah ga.e

haath kī saarī lakīreñ paañv ke talvoñ meñ thiiñ

aur mere ham-safar gard-e-safar meñ rah ga.e

kyā hujūm-e-rañg 'aḳhtar' kyā faroġh-e-bu-e-gul

mausamoñ ke zā.iqe būḌhe shajar meñ rah ga.e

manzilon ke fasle diwar-o-dar mein rah gae

kya safar tha mere sare KHwab ghar mein rah gae

ab koi taswir bhi apni jagah qaem nahin

ab hawa ke rang hi meri nazar mein rah gae

jitne manzar the mere ham-rah ghar tak aae hain

aur pas-e-manzar sawad-e-rah-guzar mein rah gae

apne qadmon ke nishan bhi band kamron mein rahe

taqchon par bhi diye KHali nagar mein rah gae

kar gai hai nam se ghafil hamein apni shanaKHt

sirf aawazon ke sae hi KHabar mein rah gae

na-KHudaon ne palaT kar jaane kyun dekha nahin

kashtiyon ke to kai taKHte bhanwar mein rah gae

kaisi kaisi aahaTen alfaz ka paikar banin

kaise kaise aks meri chashm-e-tar mein rah gae

hath ki sari lakiren panw ke talwon mein thin

aur mere ham-safar gard-e-safar mein rah gae

kya hujum-e-rang 'aKHtar' kya farogh-e-bu-e-gul

mausamon ke zaiqe buDhe shajar mein rah gae