manzilon se begana aaj bhi safar mera

manziloñ se begāna aaj bhī safar merā

raat be-sahar merī dard be-asar merā

gumrahī kā aalam hai kis ko ham-safar kahiye

thak ke chhoḌ baiThī hai saath rahguzar merā

vo faroġh-e-ḳhalvat bhī anjuman-sarāpā bhī

bhar gayā hai phūloñ se dāman-e-nazar merā

ab tire taġhāful se aur kyā talab kiije

shauq-e-nā-rasā merā ishq-e-mo'atabar merā

daur-e-kam-ayārī hai kuchh pata nahīñ chaltā

kaun merā qātil hai kaun chāra-gar merā

nā-guzīr hastī haiñ fasl-e-gul ke hañgāme

shozish-e-numū terī fitna-e-sharar merā

kuchh batāo to āḳhir kyā javāb duuñ us ko

ik savāl kartā hai roz mujh se ghar merā

āsmāñ kā shikva kyā vaqt kī shikāyat kyuuñ

ḳhūn-e-dil se nikhrā hai aur bhī hunar merā

dil kī be-qarārī ne hosh kho diye 'tābāñ'

varna āstānoñ par kab jhukā thā sar merā

manzilon se begana aaj bhi safar mera

raat be-sahar meri dard be-asar mera

gumrahi ka aalam hai kis ko ham-safar kahiye

thak ke chhoD baiThi hai sath rahguzar mera

wo farogh-e-KHalwat bhi anjuman-sarapa bhi

bhar gaya hai phulon se daman-e-nazar mera

ab tere taghaful se aur kya talab kije

shauq-e-na-rasa mera ishq-e-mo'atabar mera

daur-e-kam-ayari hai kuchh pata nahin chalta

kaun mera qatil hai kaun chaara-gar mera

na-guzir hasti hain fasl-e-gul ke hangame

shozish-e-numu teri fitna-e-sharar mera

kuchh batao to aaKHir kya jawab dun us ko

ek sawal karta hai roz mujh se ghar mera

aasman ka shikwa kya waqt ki shikayat kyun

KHun-e-dil se nikhra hai aur bhi hunar mera

dil ki be-qarari ne hosh kho diye 'taban'

warna aastanon par kab jhuka tha sar mera