manzilon usko aawaz dete rahe manzilon jis ki koi KHabar bhi na thi

manziloñ us ko āvāz dete rahe manziloñ jis kī koī ḳhabar bhī na thī

dāman-e-shab meñ koī sitāra na thā sham.a koī sar-e-rahguzar bhī na thī

ik bagūla uThā dasht meñ kho gayā ik kiran thī jo zulmat meñ gum ho ga.ī

zindagī jis ko samjhe the ham zindagī zindagī misl-e-raqs-e-sharar bhī na thī

fasl-e-gul se thā ābād sehn-e-chaman fasl-e-gul jo ga.ī raunaqeñ luT ga.iiñ

yuuñ ḳhamoshī se shām-e-ḳhizāñ aa.egī ahl-e-gulshan ko is kī ḳhabar bhī na thī

is tarah manzil-e-ārzū kaT ga.ī is tarah ye ghanī tīrgī chhaT ga.ī

apne paañv pe yaaro ḳharāsheñ to kyā apne chehre pe gard-e-safar bhī na thī

phir se āñkhoñ ke sāġhar chhalakne lage mauj-dar-mauj aañsū nikalne lage

'tāb' ghar meñ vo mehmān phir aa gayā jis ke aane kī koī ḳhabar bhī na thī

manzilon us ko aawaz dete rahe manzilon jis ki koi KHabar bhi na thi

daman-e-shab mein koi sitara na tha shama koi sar-e-rahguzar bhi na thi

ek bagula uTha dasht mein kho gaya ek kiran thi jo zulmat mein gum ho gai

zindagi jis ko samjhe the hum zindagi zindagi misl-e-raqs-e-sharar bhi na thi

fasl-e-gul se tha aabaad sehn-e-chaman fasl-e-gul jo gai raunaqen luT gain

yun KHamoshi se sham-e-KHizan aaegi ahl-e-gulshan ko is ki KHabar bhi na thi

is tarah manzil-e-arzu kaT gai is tarah ye ghani tirgi chhaT gai

apne panw pe yaro KHarashen to kya apne chehre pe gard-e-safar bhi na thi

phir se aankhon ke saghar chhalakne lage mauj-dar-mauj aansu nikalne lage

'tab' ghar mein wo mehman phir aa gaya jis ke aane ki koi KHabar bhi na thi