منظور نہیں رنج کو راحت مرے دل کی

منظور نہیں رنج کو راحت مرے دل کی

فرقت کو گوارا نہیں فرقت مرے دل کی

کیا پوچھتے ہو چارہ گرو درد و الم کو

صورت سے عیاں ہوتی ہے حالت مرے دل کی

ہر وقت مصیبت میں ہے ہر وقت بلا میں

کیا درد و الم سے ہوئی خلقت مرے دل کی

باور نہیں آتا ہے تو اے جان تم آ کر

خود دیکھ لو حالت شب فرقت مرے دل کی

وعدہ تو کیا ہے شب فرقت میں اجل نے

شاید کہ ٹھکانے لگی محنت مرے دل کی

وہ غیر کی الفت سے اگر باز بھی آئیں

جائے گی نہ تا زیست کدورت مرے دل کی

کیا لطف ملا ہجر کا اس کو بھی کہیں لطفؔ

کیوں غیر کو منظور ہے راحت مرے دل کی