manzur nahin ranj ko rahat mere dil ki

manzūr nahīñ ranj ko rāhat mire dil kī

furqat ko gavārā nahīñ furqat mire dil kī

kyā pūchhte ho chāragaro dard-o-alam ko

sūrat se ayaañ hotī hai hālat mire dil kī

har-vaqt musībat meñ hai har-vaqt balā meñ

kyā dard-o-alam se huī ḳhilqat mire dil kī

bāvar nahīñ aatā hai to ai jaan tum aa kar

ḳhud dekh lo hālat shab-e-furqat mire dil kī

vā'da to kiyā hai shab-e-furqat meñ ajal ne

shāyad ki Thikāne lagī mehnat mire dil kī

vo ġhair kī ulfat se agar baaz bhī aa.eñ

jā.egī na tā-zīst kudūrat mire dil kī

kyā lutf milā hijr kā us ko bhī kahīñ 'lutf'

kyoñ ġhair ko manzūr hai rāhat mire dil kī

manzur nahin ranj ko rahat mere dil ki

furqat ko gawara nahin furqat mere dil ki

kya puchhte ho chaaragaro dard-o-alam ko

surat se ayan hoti hai haalat mere dil ki

har-waqt musibat mein hai har-waqt bala mein

kya dard-o-alam se hui KHilqat mere dil ki

bawar nahin aata hai to ai jaan tum aa kar

KHud dekh lo haalat shab-e-furqat mere dil ki

wa'da to kiya hai shab-e-furqat mein ajal ne

shayad ki Thikane lagi mehnat mere dil ki

wo ghair ki ulfat se agar baz bhi aaen

jaegi na ta-zist kudurat mere dil ki

kya lutf mila hijr ka us ko bhi kahin 'lutf'

kyon ghair ko manzur hai rahat mere dil ki