maqam-e-hijr kahin imtihan se Khaali hai

maqām-e-hijr kahīñ imtihāñ se ḳhālī hai

kahīñ zamīñ bhī kisī āsmāñ se ḳhālī hai

nashāt-e-ġham meñ to dard-e-nihāñ talāsh na kar

nashāt-e-ġham kabhī dard-e-nihāñ se ḳhālī hai

urūj-e-ġham mire soz-e-jigar se aa pūchhā

maqām-e-dil kahīñ soz-e-nihāñ se ḳhālī hai

ḳhayāl us kā maiñ shāyad samajh nahīñ paayā

mirā ḳhayāl to ishq-e-butāñ se ḳhālī hai

ik aisī baat hī taskīn-e-qalb baḳhshe hai

'nisār' dil mirā vahm-o-gumāñ se ḳhālī hai

maqam-e-hijr kahin imtihan se KHali hai

kahin zamin bhi kisi aasman se KHali hai

nashat-e-gham mein to dard-e-nihan talash na kar

nashat-e-gham kabhi dard-e-nihan se KHali hai

uruj-e-gham mere soz-e-jigar se aa puchha

maqam-e-dil kahin soz-e-nihan se KHali hai

KHayal us ka main shayad samajh nahin paya

mera KHayal to ishq-e-butan se KHali hai

ek aisi baat hi taskin-e-qalb baKHshe hai

'nisar' dil mera wahm-o-guman se KHali hai