maqbara ban jae KHud memar ka

maqbara ban jaa.e ḳhud me'mār kā

kyā bharosa ret kī dīvār kā

kis taraf uTThe qadam kis ko ġharaz

shahr meñ charchā rahā raftār kā

ġham-zada to mutma.in sā thā magar

kis ne samjhā ġham kisī ġham-ḳhvār kā

maiñ huuñ aur har zarra-e-sahrā kā ġham

tū hai aur mātam dar-o-dīvār kā

rābta rakhiye har ik fankār se

she'r kahiye apne hī me'yār kā

is samundar meñ ghire haiñ ham jahāñ

kashtiyoñ par bojh hai patvār kā

lahr jab uTThe sadaf sāhil pe laa.e

koī mauqa' bhī to ho iz.hār kā

ḳhāma-e-be-roshnā.ī bhī huuñ maiñ

muntazir bhī huuñ kisī shahkār kā

mehr-e-'ālam-tāb sar par aa gayā

bujh gayā saayā har ik dīvār kā

koī chehra ho ki ho koī kitāb

sab pe hai jaadū samundar-pār kā

maqbara ban jae KHud me'mar ka

kya bharosa ret ki diwar ka

kis taraf uTThe qadam kis ko gharaz

shahr mein charcha raha raftar ka

gham-zada to mutmain sa tha magar

kis ne samjha gham kisi gham-KHwar ka

main hun aur har zarra-e-sahra ka gham

tu hai aur matam dar-o-diwar ka

rabta rakhiye har ek fankar se

she'r kahiye apne hi me'yar ka

is samundar mein ghire hain hum jahan

kashtiyon par bojh hai patwar ka

lahr jab uTThe sadaf sahil pe lae

koi mauqa' bhi to ho izhaar ka

KHama-e-be-roshnai bhi hun main

muntazir bhi hun kisi shahkar ka

mehr-e-'alam-tab sar par aa gaya

bujh gaya saya har ek diwar ka

koi chehra ho ki ho koi kitab

sab pe hai jadu samundar-par ka