maqdur nahin hum ko fart-e-dam-e-jaulan par

maqdūr nahīñ ham ko fart-e-dam-e-jaulāñ par

kar deñge nichhāvar jaañ ham 'ishva-e-sāmāñ par

be-raunaqī dekhūñ to hotā hai gumāñ mujh ko

ik dasht-e-huvaidā kā is ḳhāna-e-vīrāñ par

betāb nigāhoñ meñ baaqī na rahī jab taab

kyā vaqt 'ajab aayā is dīda-e-hairāñ par

jo tū ne lagāyā thā us zaḳhm-e-jigar kā hī

hotā hai gumāñ ham ko ab har gul-e-ḳhandāñ par

jalnā hī muqaddar ho to farq nahīñ paḌtā

ho mahfil-e-ḳhūbāñ meñ yā gor-e-ġharībāñ par

lāzim hai siyah-mastī kulfat ke bhulāne ko

par jaam uThānā hai mushkil tan-e-āsāñ par

zinhār nahīñ rusvā ulfat ko karegā ye

itnā to bharosā hai ham ko ġham-e-jānāñ par

iifā na huā pahle vo ab bhī nahīñ hogā

aa.egā yaqīñ kyūñkar ab vā’da-o-paimāñ par

puujā but-e-rā'nā ko itnā ki hue kāfir

ham mar miTe kuchh aise us ġhārat-e-īmāñ par

vo bāb-e-rasā.ī tak pahuñchā hī nahīñ 'sālik'

thā naaz tumheñ itnā jis nāla-e-sozāñ par

maqdur nahin hum ko fart-e-dam-e-jaulan par

kar denge nichhawar jaan hum 'ishwa-e-saman par

be-raunaqi dekhun to hota hai guman mujh ko

ek dasht-e-huwaida ka is KHana-e-viran par

betab nigahon mein baqi na rahi jab tab

kya waqt 'ajab aaya is dida-e-hairan par

jo tu ne lagaya tha us zaKHm-e-jigar ka hi

hota hai guman hum ko ab har gul-e-KHandan par

jalna hi muqaddar ho to farq nahin paDta

ho mahfil-e-KHuban mein ya gor-e-ghariban par

lazim hai siyah-masti kulfat ke bhulane ko

par jam uThana hai mushkil tan-e-asan par

zinhaar nahin ruswa ulfat ko karega ye

itna to bharosa hai hum ko gham-e-jaanan par

ifa na hua pahle wo ab bhi nahin hoga

aaega yaqin kyunkar ab wa’da-o-paiman par

puja but-e-ra'na ko itna ki hue kafir

hum mar miTe kuchh aise us ghaarat-e-iman par

wo bab-e-rasai tak pahuncha hi nahin 'salik'

tha naz tumhein itna jis nala-e-sozan par