maqdur nahin uski tajalli ke bayan ka

maqdūr nahīñ us kī tajallī ke bayāñ kā

juuñ sham.a sarāpā ho agar sarf zabāñ kā

parde ko ta.ayyun ke dar-e-dil se uThā de

khultā hai abhī pal meñ tilismāt jahāñ kā

Tuk dekh sanam-ḳhāna-e-ishq aan ke ai shaiḳh

juuñ sham-e-haram rañg jhalaktā hai butāñ kā

is gulshan-e-hastī meñ ajab diid hai lekin

jab chashm khulī gul kī to mausam hai ḳhizāñ kā

dikhlā.iye le jā ke tujhe misr kā bāzār

lekin nahīñ ḳhvāhāñ koī vaañ jins-e-girāñ kā

hastī se adam tak nafas-e-chand kī hai raah

duniyā se guzarnā safar aisā hai kahāñ kā

'saudā' jo kabhū gosh se himmat ke sune to

mazmūn yahī hai jaras-e-dil kī fuġhāñ kā

maqdur nahin us ki tajalli ke bayan ka

jun shama sarapa ho agar sarf zaban ka

parde ko tayyun ke dar-e-dil se uTha de

khulta hai abhi pal mein tilismat jahan ka

Tuk dekh sanam-KHana-e-ishq aan ke ai shaiKH

jun sham-e-haram rang jhalakta hai butan ka

is gulshan-e-hasti mein ajab did hai lekin

jab chashm khuli gul ki to mausam hai KHizan ka

dikhlaiye le ja ke tujhe misr ka bazar

lekin nahin KHwahan koi wan jins-e-giran ka

hasti se adam tak nafas-e-chand ki hai rah

duniya se guzarna safar aisa hai kahan ka

'sauda' jo kabhu gosh se himmat ke sune to

mazmun yahi hai jaras-e-dil ki fughan ka