maqtal ka mere ghar se bahut fasla nahin

maqtal kā mere ghar se bahut fāsla nahīñ

huuñ mutma.in ki sach se koī vāsta nahīñ

ik vaqt vo ki dekhe binā chain hī na thā

ik vaqt ye ki us se koī rābta nahīñ

hai satyameva jayate kī taḳhtī lagī huī

sachchā.ī ye ki sach kā vahāñ dāḳhila nahīñ

maazī kī baat chhoḌ de rakh haal par nazar

ab vo ḳhalīl ḳhaañ bhī nahīñ fāḳhta nahīñ

us ne kahā qubūl hai saudā zamīr kā

niklā mirī zabān se be-sāḳhta nahīñ

jitnī siyāsī log kareñ bevafā.iyāñ

is darja bevafā to koī dāshta nahīñ

'vāsiq' miyāñ mizāj kī shoḳhī kahāñ ga.ī

kah to rahe the ġham se koī vāsta nahīñ

maqtal ka mere ghar se bahut fasla nahin

hun mutmain ki sach se koi wasta nahin

ek waqt wo ki dekhe bina chain hi na tha

ek waqt ye ki us se koi rabta nahin

hai satyamewa jayate ki taKHti lagi hui

sachchai ye ki sach ka wahan daKHila nahin

mazi ki baat chhoD de rakh haal par nazar

ab wo KHalil KHan bhi nahin faKHta nahin

us ne kaha qubul hai sauda zamir ka

nikla meri zaban se be-saKHta nahin

jitni siyasi log karen bewafaiyan

is darja bewafa to koi dashta nahin

'wasiq' miyan mizaj ki shoKHi kahan gai

kah to rahe the gham se koi wasta nahin