مر گیا میں درد و غم سے پر نہ آیا یار ہائے

مر گیا میں درد و غم سے پر نہ آیا یار ہائے

کس قدر بے رحم ہے یاروں مرا دلدار ہائے

سب سے ملتے جلتے ہو تم ہم سے رہتے ہو جدا

غیر کو گل جانتے ہو اور ہم کو خار ہائے

سب کو عزت ہو جہاں میں ہائے کیسا یہ ستم

تیرا عاشق ہو ذلیل و بے وقار و خوار ہائے

غیر کی چھاتی سے لگ جاتے ہو میرے سامنے

بولنا بھی ہم سے رکھتے ہو پیارے عار ہائے

مر گیا وہ شخص جس سے تم کو ملنا عار تھا

کون تھا وہ تیرا رشکیؔ عاشق سرشار ہائے