mar jaenge lekin kabhi ulfat na karenge

mar jā.eñge lekin kabhī ulfat na kareñge

ham jiine ko apne ye musībat na kareñge

hai dil meñ ki mil jā.iye ab bul-havasoñ meñ

phir ham se kahāñ tak vo muravvat na kareñge

kahte haiñ mirī jaan kā jaanā nahīñ mumkin

jab tak vo mujhe aap se ruḳhsat na kareñge

ai ḳhizr jo piinā ho hameñ āb-e-baqā bhī

is phirne se mai-ḳhāne kī ḳhidmat na kareñge

tū ab to garebāñ ko mire chhoḌ de 'ārif'

bas aaj se ham tujh ko nasīhat na kareñge

mar jaenge lekin kabhi ulfat na karenge

hum jine ko apne ye musibat na karenge

hai dil mein ki mil jaiye ab bul-hawason mein

phir hum se kahan tak wo murawwat na karenge

kahte hain meri jaan ka jaana nahin mumkin

jab tak wo mujhe aap se ruKHsat na karenge

ai KHizr jo pina ho hamein aab-e-baqa bhi

is phirne se mai-KHane ki KHidmat na karenge

tu ab to gareban ko mere chhoD de 'arif'

bas aaj se hum tujh ko nasihat na karenge