mar kar bhi hai talash mujhe ku-e-yar ki

mar kar bhī hai talāsh mujhe kū-e-yār kī

miTTī ḳharāb kyoñ na ho mere ġhubār kī

vā'da bhī kar ke aa.e na ik shab vo mere ghar

chhiTkī na chāñdnī qamar-e-gul-ezār kī

kuchh tār-e-pairahan se nahīñ imtiyāz ab

hālat na pūchhiye mire jism-e-nazār kī

aanā na thā to ḳhat hī koī aap bhejte

taskīn kuchh to hotī dil-e-be-qarār kī

nargis hai shakl-e-chashm-e-tamanna ba-ainih

laala bhī hai shabīh dil-e-dāġh-dār kī

guldasta pesh kījiye laala ke phūloñ kā

sunñī hoñ gāliyāñ jo kisī gul-ezār kī

kyoñ is ke pīchhe hotī hai hairān ai sabā

milne kī gard bhī nahīñ mere ġhubār kī

vo ḳhāksār the na havā se huī buland

marne ke baad ḳhaak hamāre mazār kī

va.ada-ḳhilāf yaar se kahtā nahīñ koī

tāqat nahīñ rahī mujhe ab intizār kī

dil kā ab āñkhoñ se ye taqāzā hai rāt-din

tasvīr sāmne rahe har dam nigār kī

ġhurbat meñ kyoñ vatan kī tamanna na kījiye

kyā kyā aziyyateñ na sahīñ dasht-e-ḳhār kī

yūsuf azīz-e-misr the hāsil thī saltanat

is jaah par bhī chaah thī apne dayār kī

furqat meñ zindagānī-e-shīrīñ hai zahr-āb

ḳhvāhish ho ḳhaak mujh ko mai-e-ḳhush-gavār kī

'ājiz' hamārī āñkheñ tarastī hī rah ga.iiñ

nā-dīdoñ ko nasīb rahī diid yaar kī

mar kar bhi hai talash mujhe ku-e-yar ki

miTTi KHarab kyon na ho mere ghubar ki

wa'da bhi kar ke aae na ek shab wo mere ghar

chhiTki na chandni qamar-e-gul-ezar ki

kuchh tar-e-pairahan se nahin imtiyaz ab

haalat na puchhiye mere jism-e-nazar ki

aana na tha to KHat hi koi aap bhejte

taskin kuchh to hoti dil-e-be-qarar ki

nargis hai shakl-e-chashm-e-tamanna ba-ainih

lala bhi hai shabih dil-e-dagh-dar ki

guldasta pesh kijiye lala ke phulon ka

sunni hon galiyan jo kisi gul-ezar ki

kyon is ke pichhe hoti hai hairan ai saba

milne ki gard bhi nahin mere ghubar ki

wo KHaksar the na hawa se hui buland

marne ke baad KHak hamare mazar ki

wada-KHilaf yar se kahta nahin koi

taqat nahin rahi mujhe ab intizar ki

dil ka ab aankhon se ye taqaza hai raat-din

taswir samne rahe har dam nigar ki

ghurbat mein kyon watan ki tamanna na kijiye

kya kya aziyyaten na sahin dasht-e-KHar ki

yusuf aziz-e-misr the hasil thi saltanat

is jah par bhi chah thi apne dayar ki

furqat mein zindagani-e-shirin hai zahr-ab

KHwahish ho KHak mujh ko mai-e-KHush-gawar ki

'ajiz' hamari aankhen tarasti hi rah gain

na-didon ko nasib rahi did yar ki