mar mar ke jiye yun duniya mein jine ka saliqa bhul gae

mar mar ke jiye yuuñ duniyā meñ jiine kā salīqa bhuul ga.e

benām-o-nishāñ kuchh aise hue ham naam bhī apnā bhuul ga.e

sahrā se huī nisbat jab se vīrānoñ meñ mahfil jamtī hai

ai josh junūñ tere sadqe ābādī se rishta bhuul ga.e

sab hausle dil ke past hue sāhil pe safīna kyā pahuñchā

maujoñ se ulajhnā chhoḌ diyā tūfānoñ se laḌnā bhuul ga.e

ik ḳhvāb sā jaise dekhā thā ta.abīr na thī koī jis kī

āvāz hai kuchh kuchh yaad magar naqsh-e-ruḳh-e-zebā bhuul ga.e

ab kis kā sahārā baaqī hai ab kis se shifā māñge koī

bīmārī ne apnā kaam kiyā tum jab se masīhā bhuul ga.e

itnā hai hamārā afsāna ai 'tāhira' itnā yaad rahe

murjhā.e hue ġhunche kī tarah khilne kī tamannā bhuul ga.e

mar mar ke jiye yun duniya mein jine ka saliqa bhul gae

benam-o-nishan kuchh aise hue hum nam bhi apna bhul gae

sahra se hui nisbat jab se viranon mein mahfil jamti hai

ai josh junun tere sadqe aabaadi se rishta bhul gae

sab hausle dil ke past hue sahil pe safina kya pahuncha

maujon se ulajhna chhoD diya tufanon se laDna bhul gae

ek KHwab sa jaise dekha tha tabir na thi koi jis ki

aawaz hai kuchh kuchh yaad magar naqsh-e-ruKH-e-zeba bhul gae

ab kis ka sahaara baqi hai ab kis se shifa mange koi

bimari ne apna kaam kiya tum jab se masiha bhul gae

itna hai hamara afsana ai 'tahira' itna yaad rahe

murjhae hue ghunche ki tarah khilne ki tamanna bhul gae