maraz ghazal ka hai mujhko zukaam thoDi hai

maraz ġhazal kā hai mujh ko zukām thoḌī hai

ki merī jaan mujhe koī kaam thoḌī hai

na dekho itnī hiqārat se mā-badaulat ko

hai sar kā taaj tumhārā ġhulām thoḌī hai

maiñ kaise kar luuñ yaqīñ is meñ hai nasha saaqī

ye aañkh aañkh hai dārū-gudām thoḌī hai

yatīm-ḳhāne kā kar jaa.eñ saarā maal haḌap

harām-ḳhoroñ ke muñh meñ lagām thoḌī hai

ġhazal churānā bhī aur paḌhnā bhī dhaḌalle se

kaleja chāhiye āsān kaam thoḌī hai

tire vajūd ko kāñTā banā ke rakh degā

ye ġham kī golī hai beTā badām thoḌī hai

sunā sunā ke pakā dūñgā kaan mahfil ke

mirā kalām ye 'vāhid' kalām thoḌī hai

maraz ghazal ka hai mujh ko zukaam thoDi hai

ki meri jaan mujhe koi kaam thoDi hai

na dekho itni hiqarat se ma-badaulat ko

hai sar ka taj tumhaara ghulam thoDi hai

main kaise kar lun yaqin is mein hai nasha saqi

ye aankh aankh hai daru-gudam thoDi hai

yatim-KHane ka kar jaen sara mal haDap

haram-KHoron ke munh mein lagam thoDi hai

ghazal churana bhi aur paDhna bhi dhaDalle se

kaleja chahiye aasan kaam thoDi hai

tere wajud ko kanTa bana ke rakh dega

ye gham ki goli hai beTa badam thoDi hai

suna suna ke paka dunga kan mahfil ke

mera kalam ye 'wahid' kalam thoDi hai