مرض غزل کا ہے مجھ کو زکام تھوڑی ہے

مرض غزل کا ہے مجھ کو زکام تھوڑی ہے

کہ میری جان مجھے کوئی کام تھوڑی ہے

نہ دیکھو اتنی حقارت سے ما بدولت کو

ہے سر کا تاج تمہارا غلام تھوڑی ہے

میں کیسے کر لوں یقیں اس میں ہے نشہ ساقی

یہ آنکھ آنکھ ہے دارو گدام تھوڑی ہے

یتیم خانے کا کر جائیں سارا مال ہڑپ

حرام خوروں کے منہ میں لگام تھوڑی ہے

غزل چرانا بھی اور پڑھنا بھی دھڑلے سے

کلیجہ چاہئے آسان کام تھوڑی ہے

ترے وجود کو کانٹا بنا کے رکھ دے گا

یہ غم کی گولی ہے بیٹا بدام تھوڑی ہے

سنا سنا کے پکا دوں گا کان محفل کے

مرا کلام یہ واحدؔ کلام تھوڑی ہے