mard-e-maidan ho to kyon katra rahe ho jang se

mard-e-maidāñ ho to kyoñ katrā rahe ho jang se

kab talak ḳhar-mastiyāñ yūñhī rabāb-o-chang se

be-hisī oḌhe hue kab tak yuuñ hī zillat saheñ

koī to āvāz uThā.e ik na.e āhang se

ho baserā ḳhaak par daa.im tirā misl-e-malañg

joḌ mat rishta tū apnī zaat kā aurañg se

ho tirā aḳhlāq bar buniyād-e-ijz-o-inkisār

ādmiyyat rakh bachā kar nafratoñ ke zañg se

mat dalīleñ pesh kar kotāhiyoñ par is tarah

bā.is-e-ta.azīr Thahregā tū uzr-e-lañg se

poñchh de gard-e-taġhāful toḌ tār-e-ankabūt

naqsh raushan hoñ tirī tasvīr ke arzhang se

aañkh meñ afvāj ḳhvāboñ kī utāreñ mustaqil

aur tā'bīreñ uThā.eñ zindagī kī jang se

mard-e-maidan ho to kyon katra rahe ho jang se

kab talak KHar-mastiyan yunhi rabab-o-chang se

be-hisi oDhe hue kab tak yun hi zillat sahen

koi to aawaz uThae ek nae aahang se

ho basera KHak par daim tera misl-e-malang

joD mat rishta tu apni zat ka aurang se

ho tera aKHlaq bar buniyaad-e-ijz-o-inkisar

aadmiyyat rakh bacha kar nafraton ke zang se

mat dalilen pesh kar kotahiyon par is tarah

bais-e-tazir Thahrega tu uzr-e-lang se

ponchh de gard-e-taghaful toD tar-e-ankabut

naqsh raushan hon teri taswir ke arzhang se

aankh mein afwaj KHwabon ki utaren mustaqil

aur ta'biren uThaen zindagi ki jang se