mard KHush-KHu nahin to phir kya hai

mard ḳhush-ḳhū nahīñ to phir kyā hai

phuul meñ bū nahīñ to phir kyā hai

ho parī-rū hazār koī hasīn

ādmī-ḳhū nahīñ to phir kyā hai

kaun bastā hai ka.abe ke andar

ālam-e-hū nahīñ to phir kyā hai

vahī āñkheñ haiñ aisī hī vahshat

yaar aahū nahīñ to phir kyā hai

mutahayyar haiñ kyoñ ye ahl-e-nazar

har jagah tū nahīñ to phir kyā hai

maiñ musaḳhḳhar huā in āñkhoñ kā

in meñ jaadū nahīñ to phir kyā hai

rang-o-bū donoñ gul ko lāzim haiñ

rang hai bū nahīñ to phir kyā hai

dostoñ kā bhī qatl-e-ām kiyā

tū halākū nahīñ to phir kyā hai

tū hai qattāl-e-dahr dil meñ tire

faiz-e-rājū nahīñ to phir kyā hai

haiñ yahāñ sard-mehr sab māshūq

dakan aabū nahīñ to phir kyā hai

dil meñ faujeñ haiñ yās-o-hasrat kī

ab ye kampū nahīñ to phir kyā hai

jab talak tū hai sau bakheḌe haiñ

jis ghaḌī tū nahīñ to phir kyā hai

ho jo dushman vo dost ban jaa.e

ḳhulq jaadū nahīñ to phir kyā hai

ḳhvāb meñ dekhtā huuñ maiñ kaale

yād-e-gesū nahīñ to phir kyā hai

charḳh par chaḌh ke ban gayā mah-e-nau

terā abrū nahīñ to phir kyā hai

jis ke kahne meñ dil ho vo hī diler

us pe qaabū nahīñ to phir kyā hai

murda-dil sun ke jī uThe 'akbar'

sher jaadū nahīñ to phir kyā hai

mard KHush-KHu nahin to phir kya hai

phul mein bu nahin to phir kya hai

ho pari-ru hazar koi hasin

aadmi-KHu nahin to phir kya hai

kaun basta hai kabe ke andar

aalam-e-hu nahin to phir kya hai

wahi aankhen hain aisi hi wahshat

yar aahu nahin to phir kya hai

mutahayyar hain kyon ye ahl-e-nazar

har jagah tu nahin to phir kya hai

main musaKHKHar hua in aankhon ka

in mein jadu nahin to phir kya hai

rang-o-bu donon gul ko lazim hain

rang hai bu nahin to phir kya hai

doston ka bhi qatl-e-am kiya

tu halaku nahin to phir kya hai

tu hai qattal-e-dahr dil mein tere

faiz-e-raju nahin to phir kya hai

hain yahan sard-mehr sab mashuq

dakan aabu nahin to phir kya hai

dil mein faujen hain yas-o-hasrat ki

ab ye kampu nahin to phir kya hai

jab talak tu hai sau bakheDe hain

jis ghaDi tu nahin to phir kya hai

ho jo dushman wo dost ban jae

KHulq jadu nahin to phir kya hai

KHwab mein dekhta hun main kale

yaad-e-gesu nahin to phir kya hai

charKH par chaDh ke ban gaya mah-e-nau

tera abru nahin to phir kya hai

jis ke kahne mein dil ho wo hi diler

us pe qabu nahin to phir kya hai

murda-dil sun ke ji uThe 'akbar'

sher jadu nahin to phir kya hai