marhaba tum bhi zarurat se mile

marhabā tum bhī zarūrat se mile

kaun hai ab jo mohabbat se mile

zindagī ne jo diye ham ko sabaq

vo kahāñ pand-o-nasīhat se mile

dil milāne se bhalā kyā hāsil

jab tabī'at na tabī'at se mile

haa.e vo shahr-e-amāñ jis meñ ham

roz ik taaza qayāmat se mile

ye jo palkoñ pe saje haiñ motī

sab hameñ us dar-e-daulat se mile

kaun hogā vo ba-juz ā.īna

shakl jis kī tirī sūrat se mile

aaj pheñkī ga.ī ham par kuchh ḳhaak

aaj ham apnī haqīqat se mile

ham ne samjhā hai unheñ pyaar ke phuul

zaḳhm jo sañg-e-malāmat se mile

the vo ujlat meñ ga.e ye kah kar

jis ko fursat ho vo fursat se mile

marhaba tum bhi zarurat se mile

kaun hai ab jo mohabbat se mile

zindagi ne jo diye hum ko sabaq

wo kahan pand-o-nasihat se mile

dil milane se bhala kya hasil

jab tabi'at na tabi'at se mile

hae wo shahr-e-aman jis mein hum

roz ek taza qayamat se mile

ye jo palkon pe saje hain moti

sab hamein us dar-e-daulat se mile

kaun hoga wo ba-juz aaina

shakl jis ki teri surat se mile

aaj phenki gai hum par kuchh KHak

aaj hum apni haqiqat se mile

hum ne samjha hai unhen pyar ke phul

zaKHm jo sang-e-malamat se mile

the wo ujlat mein gae ye kah kar

jis ko fursat ho wo fursat se mile