marhala-dar-marhala yun mujhko sar usne kiya

marhala-dar-marhala yuuñ mujh ko sar us ne kiyā

merī nazroñ se guzar kar dil meñ ghar us ne kiyā

chhāñv haath aa.ī nahīñ yūñhī ghane ashjār kī

chilchilātī dhuup meñ bhī tai safar us ne kiyā

har qadam par saath mere laġhzishoñ kī bhiiḌ thī

chashm-e-bāliġh se unheñ sarf-e-nazar us ne kiyā

kah rahe haiñ kaale gahre aañkh ke vo dā.ere

zahr pī kar zulmat-e-shab ko sahar us ne kiyā

qatl ḳhanjar se agar kartā na kartā maiñ gila

maslahat kī dhaar se ḳhūn-e-jigar us ne kiyā

ḳhūn-e-dil se zaḳhm-e-jāñ ko sīñchnā āsāñ na thā

kaam vaise thā bahut mushkil magar us ne kiyā

ek vo mujh ko zamīñ kā chāñd kahtā hai 'nazar'

us kā ehsāñ hai ki zarre ko qamar us ne kiyā

marhala-dar-marhala yun mujh ko sar us ne kiya

meri nazron se guzar kar dil mein ghar us ne kiya

chhanw hath aai nahin yunhi ghane ashjar ki

chilchilati dhup mein bhi tai safar us ne kiya

har qadam par sath mere laghzishon ki bhiD thi

chashm-e-baaligh se unhen sarf-e-nazar us ne kiya

kah rahe hain kale gahre aankh ke wo daere

zahr pi kar zulmat-e-shab ko sahar us ne kiya

qatl KHanjar se agar karta na karta main gila

maslahat ki dhaar se KHun-e-jigar us ne kiya

KHun-e-dil se zaKHm-e-jaan ko sinchna aasan na tha

kaam waise tha bahut mushkil magar us ne kiya

ek wo mujh ko zamin ka chand kahta hai 'nazar'

us ka ehsan hai ki zarre ko qamar us ne kiya