مرحلہ دید کا دشوار نہیں ہے کوئی

مرحلہ دید کا دشوار نہیں ہے کوئی

عشق کی راہ میں دیوار نہیں ہے کوئی

کس قدر سرد ہوا حوصلۂ سنگ زنی

شیش محلوں پہ بھی یلغار نہیں ہے کوئی

دل ہوئے جوہر احساس وفا سے محروم

اب غم عشق کا معیار نہیں ہے کوئی

لوگ بیٹھے ہیں اندھیروں کی تجارت کرنے

چاند سورج کا خریدار نہیں ہے کوئی

جانے کس سمت محبت میں گئے دیوانے

آج ہنگامۂ سردار نہیں ہے کوئی

قافلے والے جدھر رخ ہے چلے جاتے ہیں

جیسے اب قافلہ سالار نہیں ہے کوئی

دھوپ ہی دھوپ میں پہروں تجھے چلنا ہے مجیدؔ

دور تک سایۂ دیوار نہیں ہے کوئی