marhala dil ka na tasKHir hua

marhala dil kā na tasḳhīr huā

tū kahāñ aa ke ināñ-gīr huā

kaam duniyā kā hai tīr-andāzī

ham hue yā koī naḳhchīr huā

sañg-e-buniyādī haiñ ham us ghar kā

jo kisī tarah na ta.amīr huā

safar-e-shauq kā hāsil ma.alūm

rāsta paañv kī zanjīr huā

umr-bhar jis kī shikāyat kī hai

dil usī aag se iksīr huā

kis se pūchheñ ki vo andāz-e-nazar

kab tabassum huā kab tiir huā

kaun ab dād-e-suḳhan de 'bāqī'

jis ne do sher kahe 'mīr' huā

marhala dil ka na tasKHir hua

tu kahan aa ke inan-gir hua

kaam duniya ka hai tir-andazi

hum hue ya koi naKHchir hua

sang-e-buniyaadi hain hum us ghar ka

jo kisi tarah na tamir hua

safar-e-shauq ka hasil malum

rasta panw ki zanjir hua

umr-bhar jis ki shikayat ki hai

dil usi aag se iksir hua

kis se puchhen ki wo andaz-e-nazar

kab tabassum hua kab tir hua

kaun ab dad-e-suKHan de 'baqi'

jis ne do sher kahe 'mir' hua