marhala shauq ka hai lafz-o-bayan se aage

marhala shauq kā hai lafz-o-bayāñ se aage

ek sho.ala hai koī barq-e-tapāñ se aage

apnī hairat kā to hai ilm yaqīñ se pahle

tū batā mujh ko hai kyā mere gumāñ se aage

haañ mirā shauq-laqā terī ināyat hī sahī

kyā milā mujh ko magar ijz-e-bayāñ se aage

kyuuñ banā Daalā ise merī nigāhoñ kā ġhurūr

terā jalva hai agar husn-e-butāñ se aage

apnī ḳhalvat se kabhī tū bhī na bāhar jhāñkā

mujh ko jaane na diyā mere makāñ se aage

kuchh nahīñ is ke sivā apnī nigāhoñ kī bisāt

kuchh dikhā.ī na diyā sūd-o-ziyāñ se aage

fahm-o-idrāk pe bhī mere hai pahrā terā

aur tū saare makāñ saare zamāñ se aage

imtihāñ ḳhatm nahīñ hotā isī par 'tarzī'

jū-e-ḳhūñ laanī hai ik ashk-e-ravāñ se aage

marhala shauq ka hai lafz-o-bayan se aage

ek shoala hai koi barq-e-tapan se aage

apni hairat ka to hai ilm yaqin se pahle

tu bata mujh ko hai kya mere guman se aage

han mera shauq-laqa teri inayat hi sahi

kya mila mujh ko magar ijz-e-bayan se aage

kyun bana Dala ise meri nigahon ka ghurur

tera jalwa hai agar husn-e-butan se aage

apni KHalwat se kabhi tu bhi na bahar jhanka

mujh ko jaane na diya mere makan se aage

kuchh nahin is ke siwa apni nigahon ki bisat

kuchh dikhai na diya sud-o-ziyan se aage

fahm-o-idrak pe bhi mere hai pahra tera

aur tu sare makan sare zaman se aage

imtihan KHatm nahin hota isi par 'tarzi'

ju-e-KHun lani hai ek ashk-e-rawan se aage