marhale aae rah-e-ishq mein dushwar kai

marhale aa.e rah-e-ishq meñ dushvār ka.ī

maiñ ne ik chāñd ke dekhe haiñ talabgār ka.ī

vahshat-e-ram thī tabī.at meñ ġhazāloñ jaisī

yuuñ to aate hī rahe raah meñ chhitnār ka.ī

huuñ vo tasvīr jo ab tak hai nihāñ rañgoñ meñ

yuuñ to sunte haiñ ki haiñ shahr meñ fankār ka.ī

ziist karnā bhī huā chaumukhī laḌnā goyā

apnī hī zaat se bhī hote haiñ paikār ka.ī

chashm-e-bīnā ho parakh ho to nazar ā.eñge

haft-iqlīm liye phirte haiñ nādār ka.ī

sar pe sūraj thā zamīñ saḳht akelī thī maiñ

saa.e meñ pahuñchī to the hamdam-o-dildār ka.ī

munharif chāragarī se huā īmāñ merā

dil dukhā jaate haiñ kuchh aur bhī ġham-ḳhvār ka.ī

marhale aae rah-e-ishq mein dushwar kai

main ne ek chand ke dekhe hain talabgar kai

wahshat-e-ram thi tabiat mein ghazalon jaisi

yun to aate hi rahe rah mein chhitnar kai

hun wo taswir jo ab tak hai nihan rangon mein

yun to sunte hain ki hain shahr mein fankar kai

zist karna bhi hua chaumukhi laDna goya

apni hi zat se bhi hote hain paikar kai

chashm-e-bina ho parakh ho to nazar aaenge

haft-iqlim liye phirte hain nadar kai

sar pe suraj tha zamin saKHt akeli thi main

sae mein pahunchi to the hamdam-o-dildar kai

munharif chaaragari se hua iman mera

dil dukha jate hain kuchh aur bhi gham-KHwar kai