مرحلے جس میں بہت حشر نشاں گزرے ہیں

مرحلے جس میں بہت حشر نشاں گزرے ہیں

اس رہ شوق سے ہم رقص کناں گزرے ہیں

جن مقامات جنوں سے تھا گزرنا مشکل

ہم انہی سے صفت سیل رواں گزرے ہیں

یہ دمکتے ہوئے ذرات پتہ دیتے ہیں

اس طرف سے وہ کبھی نور فشاں گزرے ہیں

جو بھی گزرے ہیں تری یاد سے غافل رہ کر

زندگی میں وہی لمحات گراں گزرے ہیں

تشنگی ذوق نظارہ کی وہی ہے کہ جو تھی

یوں نظر سے کئی رنگین سماں گزرے ہیں

منشاؔ اپنا ہی جگر ہے کہ رہ زیست سے یوں

بے حجابانہ بصد عزم جواں گزرے ہیں