marham bhi mere zaKHm ka aazar se nikla

marham bhī mire zaḳhm kā āzār se niklā

iqrār kā pahlū tire inkār se niklā

thā terī ra.ūnat ke pas-e-parda koī aur

sar aur kisī kā tirī dastār se niklā

kis shaḳhs kī rah dekhne betāb sā ho kar

saayā kabhī dar se kabhī dīvār se niklā

yādoñ ke kisī baab meñ rakhā huā koī ḳhvāb

sūkhe hue ik phuul kī mahkār se niklā

is sañg-sifat shaḳhs ke lahje meñ mohabbat

yā chashma-e-shīrīñ kisī kohsār se niklā

duniyā tirī sūrat ke ḳharīdār bahut the

luT kar hī gayā jo tire bāzār se niklā

is ḳhaak kī tah meñ thī koī mauj-e-balā-ḳhez

lafzoñ kā samundar mire afkār se niklā

marham bhi mere zaKHm ka aazar se nikla

iqrar ka pahlu tere inkar se nikla

tha teri raunat ke pas-e-parda koi aur

sar aur kisi ka teri dastar se nikla

kis shaKHs ki rah dekhne betab sa ho kar

saya kabhi dar se kabhi diwar se nikla

yaadon ke kisi bab mein rakha hua koi KHwab

sukhe hue ek phul ki mahkar se nikla

is sang-sifat shaKHs ke lahje mein mohabbat

ya chashma-e-shirin kisi kohsar se nikla

duniya teri surat ke KHaridar bahut the

luT kar hi gaya jo tere bazar se nikla

is KHak ki tah mein thi koi mauj-e-bala-KHez

lafzon ka samundar mere afkar se nikla