marham-e-zaKHm-e-jigar ho jae

marham-e-zaḳhm-e-jigar ho jaa.e

ek aisī bhī nazar ho jaa.e

ik ishāra bhī agar ho jaa.e

is shab-e-ġham kī sahar ho jaa.e

sub.h ye fikr ki ho jaa.e shaam

shaam ko ye ki sahar ho jaa.e

ho na itnā bhī pareshāñ koī

ki zamāne ko ḳhabar ho jaa.e

yuuñ to jo kuchh bhī kisī par guzre

dil na afsurda magar ho jaa.e

fikr-e-fardā bhī kareñge 'hairat'

pahle ye shab to basar ho jaa.e

marham-e-zaKHm-e-jigar ho jae

ek aisi bhi nazar ho jae

ek ishaara bhi agar ho jae

is shab-e-gham ki sahar ho jae

subh ye fikr ki ho jae sham

sham ko ye ki sahar ho jae

ho na itna bhi pareshan koi

ki zamane ko KHabar ho jae

yun to jo kuchh bhi kisi par guzre

dil na afsurda magar ho jae

fikr-e-farda bhi karenge 'hairat'

pahle ye shab to basar ho jae