markaz se kahin dur kisi rahguzar mein

markaz se kahīñ duur kisī rāhguzar meñ

pāoge jo miltā nahīñ bhūle se bhī ghar meñ

vo ramz talab jis kī hai mehrāb-e-haram meñ

dil meñ hai to kyā DhūñDhiye dīvār meñ dar meñ

vo baat purānī huī kab ke haiñ vo qisse

rahtā thā shab-o-roz jo saudā koī sar meñ

kyā shorish-e-daurāñ ke muqābil nahīñ rahte

Darte nahīñ maujoñ se jo palte haiñ bhañvar haiñ

dam lene ko Thahre haiñ to kyā hausla chhūTā

baaqī hai abhī kāvish-e-parvāz to par meñ

ab zād-e-safar kyā hai ba-juz ābla-pā.ī

manzil to ḳhudā jaane magar ham haiñ safar meñ

hasrat koī baaqī nahīñ TuuTe hue dil meñ

rahtā hai kahīñ koī bhī vīrān khañDar meñ

tab vaqt koī aur thā shāmeñ thiiñ sahar-gūñ

ab shab meñ koī lutf hai 'rizvāñ' na sahar meñ

markaz se kahin dur kisi rahguzar mein

paoge jo milta nahin bhule se bhi ghar mein

wo ramz talab jis ki hai mehrab-e-haram mein

dil mein hai to kya DhunDhiye diwar mein dar mein

wo baat purani hui kab ke hain wo qisse

rahta tha shab-o-roz jo sauda koi sar mein

kya shorish-e-dauran ke muqabil nahin rahte

Darte nahin maujon se jo palte hain bhanwar hain

dam lene ko Thahre hain to kya hausla chhuTa

baqi hai abhi kawish-e-parwaz to par mein

ab zad-e-safar kya hai ba-juz aabla-pai

manzil to KHuda jaane magar hum hain safar mein

hasrat koi baqi nahin TuTe hue dil mein

rahta hai kahin koi bhi viran khanDar mein

tab waqt koi aur tha shamen thin sahar-gun

ab shab mein koi lutf hai 'rizwan' na sahar mein