marna azab tha kabhi jina azab tha

marnā azaab thā kabhī jiinā azaab thā

merā mushīr ishq sā ḳhāna-ḳharāb thā

dil mar miTā tilāvat-e-ruḳhsār-e-yār meñ

marhūm tiflagī se hī ahl-e-kitāb thā

sochā to is habīb ko paayā qarīb-e-jāñ

dekhā to āstīñ meñ chhupā āftāb thā

vo bārgāh merī vafā kā javāz thī

is āstāñ kī ḳhaak mirā hī shabāb thā

merī har ek sub.h thī āġhosh-e-dilbarī

merī har ek shaam kā unvāñ sharāb thā

dil bhī sanam-parast nazar bhī sanam-parast

is āshiqī meñ ḳhāna hama āftāb thā

kab is siyāh-baḳht ne chhoḌā kisī kā saath

dasht-e-junūñ meñ saaya mirā ham-rikāb thā

tū kab ma.āl-e-jaur-o-jafā ko samajh sakā

terā jamāl tere liye bhī hijāb thā

jis daur ko faqīh ne isyāñ samajh liyā

us daur meñ to pī ke bahaknā savāb thā

vo husn kis qadar adab-āmoz thā 'zahīr'

qad ḳhāma-e-ravāñ thā to chehra kitāb thā

marna azab tha kabhi jina azab tha

mera mushir ishq sa KHana-KHarab tha

dil mar miTa tilawat-e-ruKHsar-e-yar mein

marhum tiflagi se hi ahl-e-kitab tha

socha to is habib ko paya qarib-e-jaan

dekha to aastin mein chhupa aaftab tha

wo bargah meri wafa ka jawaz thi

is aastan ki KHak mera hi shabab tha

meri har ek subh thi aaghosh-e-dilbari

meri har ek sham ka unwan sharab tha

dil bhi sanam-parast nazar bhi sanam-parast

is aashiqi mein KHana hama aaftab tha

kab is siyah-baKHt ne chhoDa kisi ka sath

dasht-e-junun mein saya mera ham-rikab tha

tu kab maal-e-jaur-o-jafa ko samajh saka

tera jamal tere liye bhi hijab tha

jis daur ko faqih ne isyan samajh liya

us daur mein to pi ke bahakna sawab tha

wo husn kis qadar adab-amoz tha 'zahir'

qad KHama-e-rawan tha to chehra kitab tha