marne ka pata de mere jine ka pata de

marne kā pata de mire jiine kā pata de

ai be-ḳhabarī kuchh mire hone kā pata de

ik dūsre kī āhaToñ pe chalte haiñ sab log

hai koī yahāñ jo mujhe raste kā pata de

ḳhud aap se bichhḌā huuñ maiñ is andhe safar meñ

ai tīrgī-e-shab mire saa.e kā pata de

is aas pe har aa.ine ko joḌ rahā huuñ

shāyad koī reza mire chehre kā pata de

guzrī hai mirī 'umr sarāboñ ke safar meñ

ai reg-e-ravāñ ab kisī chashme kā pata de

har pal kisī aahaT pe mire kaan lage haiñ

jaise abhī koī tire aane kā pata de

bikhrā huā huuñ sadiyoñ kī be-ant tahoñ meñ

mujh ko koī kho.e hue lamhe kā pata de

dahlīz dilāsā hai na dīvār amaañ hai

ai dar-badarī mere Thikāne kā pata de

huuñ qaid hisār-e-rag-e-girdāb meñ 'sarmad'

koī nahīñ jo mujh ko kināre kā pata de

marne ka pata de mere jine ka pata de

ai be-KHabari kuchh mere hone ka pata de

ek dusre ki aahaTon pe chalte hain sab log

hai koi yahan jo mujhe raste ka pata de

KHud aap se bichhDa hun main is andhe safar mein

ai tirgi-e-shab mere sae ka pata de

is aas pe har aaine ko joD raha hun

shayad koi reza mere chehre ka pata de

guzri hai meri 'umr sarabon ke safar mein

ai reg-e-rawan ab kisi chashme ka pata de

har pal kisi aahaT pe mere kan lage hain

jaise abhi koi tere aane ka pata de

bikhra hua hun sadiyon ki be-ant tahon mein

mujh ko koi khoe hue lamhe ka pata de

dahliz dilasa hai na diwar aman hai

ai dar-badari mere Thikane ka pata de

hun qaid hisar-e-rag-e-girdab mein 'sarmad'

koi nahin jo mujh ko kinare ka pata de