مرنے کی تمنا ہے نہ جینے کی ہوس ہے

مرنے کی تمنا ہے نہ جینے کی ہوس ہے

گلشن میں نشیمن ہے نہ صحرا میں قفس ہے

بھٹکے ہوئے راہی کے قدم لیتی ہے منزل

اس راہ میں پیغام سکوں بانگ جرس ہے

دیکھو تو ذرا دعوائے ارباب محبت

ہر رنگ میں پنہاں کوئی عنوان ہوس ہے

گلزار محبت ہے کہ بستان حقیقت

بلبل ہے شرر بار تو گل شعلہ نفس ہے

اشکوں سے نہیں دیدۂ غم ناک کو مطلب

آنکھوں میں مری نرگس بیمار کا رس ہے

کھوئے ہوئے راہی ہیں تو بھٹکے ہوئے رہبر

اس دور میں زمزمؔ جو نہ ہو جائے وہ بس ہے