marne pe mere dasht mein mahshar ka saman hai

marne pe mire dasht meñ mahshar kā samāñ hai

ik shor-e-qayāmat hai koī āh-o-fuġhāñ hai

roke to koī 'umr-e-subuk-ḳhez ko yaaro

ik asp-e-subuk-gām hai ik āb-e-ravāñ hai

ummīd-e-vafā rakhte ho kyoñ ziist se logo

mai-kash na rahe jaane kahāñ pīr-e-muġhāñ hai

maqtal meñ ‘alassub.h ḳhamoshī kā huā raaj

ab ek fasāna hī yahāñ raqs-kunāñ hai

parvān chaḌhī buuñd jo āġhosh-e-sadaf meñ

qismat ki vo zebā.ish-e-hulqūm-e-butāñ hai

tāsīr nahīñ merī kisī baat meñ 'sālik'

kahtā nahīñ huuñ kuchh bhī ki lafzoñ kā ziyāñ hai

marne pe mere dasht mein mahshar ka saman hai

ek shor-e-qayamat hai koi aah-o-fughan hai

roke to koi 'umr-e-subuk-KHez ko yaro

ek asp-e-subuk-gam hai ek aab-e-rawan hai

ummid-e-wafa rakhte ho kyon zist se logo

mai-kash na rahe jaane kahan pir-e-mughan hai

maqtal mein ‘alassubh KHamoshi ka hua raj

ab ek fasana hi yahan raqs-kunan hai

parwan chaDhi bund jo aaghosh-e-sadaf mein

qismat ki wo zebaish-e-hulqum-e-butan hai

tasir nahin meri kisi baat mein 'salik'

kahta nahin hun kuchh bhi ki lafzon ka ziyan hai