marte dam nam tera lab ke jo aa jae qarib

marte dam naam tirā lab ke jo aa jaa.e qarīb

jī ko ThanDak ho tap-e-ġham na mire aa.e qarīb

bosa māñgūñ to kaheñ mujh se ye bulvā ke qarīb

kis kā muñh hai jo mire muñh ke vo muñh laa.e qarīb

haath dauḌā.ūñ na kyuuñ jabki vo yuuñ aa.e qarīb

paañv phailā.ūñ na kyuuñ paañv jo phailā.e qarīb

paas aa.uuñ to kahe pās-e-adab bhī hai zarūr

duur jā.ūñ to vahāñ jaa.e taqāzā-e-qarīb

mujh ko ai pīr-e-muġhāñ mohtasib-e-nā-hanjār

qurb-e-mahshar hai ki be-qurbī se bulvā.e qarīb

ġham-e-dūrī se tire kūche ke royā āshiq

vaañ se jab rauza-e-rizvān use laa.e qarīb

merī bedārī se ai daulat-e-bedār ho kyā

baḳht jāgeñ jo mujhe apne to bulvā.e qarīb

mere nāloñ se na din chain na shab ko hai qarār

marg ke pahuñche haiñ ab to mire ham-sā.e qarīb

aisī majlis se agar rahiye ba.iid aulā hai

dil dimāġh apnā to vo aur ye ġhauġhā-e-qarīb

paas jā.ūñ to machal kar kahe chal yaañ se duur

duur baiThūñ to ghuḌak kar mujhe farmā.e qarīb

ishq ke pech meñ huuñ chāhiye hamdam pas-e-marg

ishq-e-pechāñ hī mirī qabr ke lagvā.e qarīb

mushk-o-sandal ho tire rañg se bāloñ ham-sar

ġhussa dil ko mire kis tarah na aa jaa.e qarīb

kuchh radīf ab kī baḌhā qāfiya 'ehsāñ' tū badal

phir qarīb aise biThā tujh ko vo biThlā.e qarīb

marte dam nam tera lab ke jo aa jae qarib

ji ko ThanDak ho tap-e-gham na mere aae qarib

bosa mangun to kahen mujh se ye bulwa ke qarib

kis ka munh hai jo mere munh ke wo munh lae qarib

hath dauDaun na kyun jabki wo yun aae qarib

panw phailaun na kyun panw jo phailae qarib

pas aaun to kahe pas-e-adab bhi hai zarur

dur jaun to wahan jae taqaza-e-qarib

mujh ko ai pir-e-mughan mohtasib-e-na-hanjar

qurb-e-mahshar hai ki be-qurbi se bulwae qarib

gham-e-duri se tere kuche ke roya aashiq

wan se jab rauza-e-rizwan use lae qarib

meri bedari se ai daulat-e-bedar ho kya

baKHt jagen jo mujhe apne to bulwae qarib

mere nalon se na din chain na shab ko hai qarar

marg ke pahunche hain ab to mere ham-sae qarib

aisi majlis se agar rahiye baid aula hai

dil dimagh apna to wo aur ye ghaugha-e-qarib

pas jaun to machal kar kahe chal yan se dur

dur baiThun to ghuDak kar mujhe farmae qarib

ishq ke pech mein hun chahiye hamdam pas-e-marg

ishq-e-pechan hi meri qabr ke lagwae qarib

mushk-o-sandal ho tere rang se baalon ham-sar

ghussa dil ko mere kis tarah na aa jae qarib

kuchh radif ab ki baDha qafiya 'ehsan' tu badal

phir qarib aise biTha tujh ko wo biThlae qarib