masafat-e-shab-e-hijran tawil likhte rahe

masāfat-e-shab-e-hijrāñ tavīl likhte rahe

mile jo dard unheñ sañg-e-mīl likhte rahe

hikāyateñ hī nahīñ likkhīñ aag kī ham ne

haqīqateñ bhī ba-rañg-e-ḳhalīl likhte rahe

jo qalb-o-jāñ meñ hai ḳhushbū kisī kī zulfoñ kī

usī ko apnī matā-e-jalīl likhte rahe

rahī ye aas ki sairāb hogī kisht-e-hayāt

so jauhaḌoñ ko bhī dariyā-e-nīl likhte rahe

nikal sakī na vahāñ ek buuñd bhī 'fāḳhir'

tamām-umr jin āñkhoñ ko jhiil likhte rahe

masafat-e-shab-e-hijran tawil likhte rahe

mile jo dard unhen sang-e-mil likhte rahe

hikayaten hi nahin likkhin aag ki hum ne

haqiqaten bhi ba-rang-e-KHalil likhte rahe

jo qalb-o-jaan mein hai KHushbu kisi ki zulfon ki

usi ko apni mata-e-jalil likhte rahe

rahi ye aas ki sairab hogi kisht-e-hayat

so jauhaDon ko bhi dariya-e-nil likhte rahe

nikal saki na wahan ek bund bhi 'faKHir'

tamam-umr jin aankhon ko jhil likhte rahe