masala hai to koi hal bhi nikala jae

mas.ala hai to koī hal bhī nikālā jaa.e

aao hālāt ko mil-jul ke sambhālā jaa.e

ham to ā.īna-sifat log haiñ sach boleñge

ham pe hargiz na koī sang uchhālā jaa.e

yā to ḳhvāboñ meñ haqīqat kā koī rang bharo

yā to kah do ki koī ḳhvāb na paalā jaa.e

ishq meñ haar bhī mumkin hai magar badle meñ

phuul se chehroñ pe tezāb na Daalā jaa.e

talḳh lahje se banī baat bigaḌ jaatī hai

soch kar lafz koī muñh se nikālā jaa.e

jin se 'mashkūr' sañbhālā na gayā ghar apnā

kaise phir un se bhalā mulk sañbhālā jaa.e

masala hai to koi hal bhi nikala jae

aao haalat ko mil-jul ke sambhaala jae

hum to aaina-sifat log hain sach bolenge

hum pe hargiz na koi sang uchhaala jae

ya to KHwabon mein haqiqat ka koi rang bharo

ya to kah do ki koi KHwab na pala jae

ishq mein haar bhi mumkin hai magar badle mein

phul se chehron pe tezab na Dala jae

talKH lahje se bani baat bigaD jati hai

soch kar lafz koi munh se nikala jae

jin se 'mashkur' sanbhaala na gaya ghar apna

kaise phir un se bhala mulk sanbhaala jae