masala ye bhi ba-faiz-e-ishq aasan ho gaya

mas.ala ye bhī ba-faiz-e-ishq āsāñ ho gayā

ziist ko andāza-e-ġham-hā-e-daurāñ ho gayā

dil meñ jab ehsās kā sho.ala farozāñ ho gayā

nuur afshāñ har charāġh-e-bazm-e-imkāñ ho gayā

tere lahrāte hī ai jān-e-tarab rūh-e-nashāt

zindagī raqsāñ huī aalam ġhazal-ḳhvāñ ho gayā

is tarah merī bahār-e-zindagī ruḳhsat huī

dil ujaḌ kar rah gayā āġhosh vīrāñ ho gayā

ho ga.ī jab zaḳhma-zan dard-e-mohabbat kī ḳhalish

har nafas ik naġhma-e-sāz-e-rag-e-jāñ ho gayā

anjum-afshāñ ho ga.ī jab merī chashm-e-ashk-bār

dard kī tiira fazāoñ meñ charāġhāñ ho gayā

jis ke ā.īne meñ lākhoñ rañg the jalva-fagan

ḳhvāb sā vo lamha-e-aish-e-farāvāñ ho gayā

maiñ ne har but kī parastish kī kuchh is andāz se

kufr merā lā.eq-e-arbāb-e-īmāñ ho gayā

aah muztar ab vo jalve haiñ na vo ra.anā.iyāñ

har nazāra sāya-e-umr-e-gurezāñ ho gayā

masala ye bhi ba-faiz-e-ishq aasan ho gaya

zist ko andaza-e-gham-ha-e-dauran ho gaya

dil mein jab ehsas ka shoala farozan ho gaya

nur afshan har charagh-e-bazm-e-imkan ho gaya

tere lahraate hi ai jaan-e-tarab ruh-e-nashat

zindagi raqsan hui aalam ghazal-KHwan ho gaya

is tarah meri bahaar-e-zindagi ruKHsat hui

dil ujaD kar rah gaya aaghosh viran ho gaya

ho gai jab zaKHma-zan dard-e-mohabbat ki KHalish

har nafas ek naghma-e-saz-e-rag-e-jaan ho gaya

anjum-afshan ho gai jab meri chashm-e-ashk-bar

dard ki tera fazaon mein charaghan ho gaya

jis ke aaine mein lakhon rang the jalwa-fagan

KHwab sa wo lamha-e-aish-e-farawan ho gaya

main ne har but ki parastish ki kuchh is andaz se

kufr mera laeq-e-arbab-e-iman ho gaya

aah muztar ab wo jalwe hain na wo ranaiyan

har nazara saya-e-umr-e-gurezan ho gaya