مسئلے اور بھی ہیں دل کے مسائل کے سوا

مسئلے اور بھی ہیں دل کے مسائل کے سوا

منزلیں اور بہت عشق کی منزل کے سوا

اپنی کشتی کو ذرا خوگر طوفاں کر لے

آسرے اور بھی مل جائیں گے ساحل کے سوا

شاید انسان کی قسمت ہی میں آرام نہیں

مشکلیں اور بھی ہیں موت کی مشکل کے سوا

جی میں آتا ہے تجھے نذر کروں سارا جہاں

اور مرے پاس نہیں کچھ بھی مرے دل کے سوا

میں شب ہجر کے ہر لطف سے محفوظ ہوا

میرے پہلو میں مگر کوئی نہ تھا دل کے سوا

فکر دنیا کی کبھی اور کبھی دل کا الم

زندگی کچھ بھی نہیں چند مسائل کے سوا