masarrat chiz kya hai ranj kya hai

masarrat chiiz kyā hai rañj kyā hai

ye saarā khel ik ehsās kā hai

bahār-e-zindagī kahte haiñ jis ko

kisī ke ik tabassum kī ziyā hai

ḳhatā-e-bevafā.ī aur ham se

yaqīnan aap ko dhokā huā hai

abhī badlī nahīñ insāñ kī fitrat

ye ab bhī dushman-e-mehr-o-vafā hai

kisī ke jaur kā had se guzarnā

hamārī ḳhāmushī kī intihā hai

kisī kī bazm tak ho kyā rasā.ī

muqaddar hī hamārā nā-rasā hai

use kyā vāsta dair-o-haram se

vo jis ne rāz-e-ulfat pā liyā hai

hazāroñ rāhateñ us par nichhāvar

tumhārā ġham jise raas aa gayā hai

kabhī sunte nahīñ haiñ aap varna

hamāre dil meñ bhī ik mudda.ā hai

maiñ un ko pūjtā huuñ jaañ se dil se

vo jin ke dil meñ ehsās-e-vafā hai

talātum-ḳhez maujoñ se guzar jā

lab-e-sāhil khaḌā kyā sochtā hai

hameñ mutlaq nahīñ ehsās 'āsī'

hamārī zindagī be-āsrā hai

masarrat chiz kya hai ranj kya hai

ye sara khel ek ehsas ka hai

bahaar-e-zindagi kahte hain jis ko

kisi ke ek tabassum ki ziya hai

KHata-e-bewafai aur hum se

yaqinan aap ko dhoka hua hai

abhi badli nahin insan ki fitrat

ye ab bhi dushman-e-mehr-o-wafa hai

kisi ke jaur ka had se guzarna

hamari KHamushi ki intiha hai

kisi ki bazm tak ho kya rasai

muqaddar hi hamara na-rasa hai

use kya wasta dair-o-haram se

wo jis ne raaz-e-ulfat pa liya hai

hazaron rahaten us par nichhawar

tumhaara gham jise ras aa gaya hai

kabhi sunte nahin hain aap warna

hamare dil mein bhi ek muddaa hai

main un ko pujta hun jaan se dil se

wo jin ke dil mein ehsas-e-wafa hai

talatum-KHez maujon se guzar ja

lab-e-sahil khaDa kya sochta hai

hamein mutlaq nahin ehsas 'asi'

hamari zindagi be-asra hai