masarrat ki farawani ke din hain

masarrat kī farāvānī ke din haiñ

mohabbat kī jahāñbānī ke din haiñ

tamannāoñ kī shādābī kā mausam

ye armānoñ kī jaulānī ke din haiñ

hai kaliyoñ ke tabassum kā zamāna

guloñ kī chāk-dāmānī ke din haiñ

manāzir meñ hai rañgīnī ġhazab kī

nazar kī shauq-sāmānī ke din haiñ

uThe haiñ chaar sū bādal ḳhushī ke

hasīñ jazboñ kī tuġhyānī ke din haiñ

mile haiñ pyaar ke anmol tohfe

ḳhulūs-e-dil kī arzānī ke din haiñ

hue raushan muqaddar ke sitāre

falak kī nūr-afshānī ke din haiñ

salāmat rahmat-e-haq kā tasalsul

mubārak fazl-e-rabbānī ke din haiñ

masarrat ki farawani ke din hain

mohabbat ki jahanbani ke din hain

tamannaon ki shadabi ka mausam

ye armanon ki jaulani ke din hain

hai kaliyon ke tabassum ka zamana

gulon ki chaak-damani ke din hain

manazir mein hai rangini ghazab ki

nazar ki shauq-samani ke din hain

uThe hain chaar su baadal KHushi ke

hasin jazbon ki tughyani ke din hain

mile hain pyar ke anmol tohfe

KHulus-e-dil ki arzani ke din hain

hue raushan muqaddar ke sitare

falak ki nur-afshani ke din hain

salamat rahmat-e-haq ka tasalsul

mubarak fazl-e-rabbani ke din hain