مسرت کی گھٹائیں ہیں وفور شادمانی ہے

مسرت کی گھٹائیں ہیں وفور شادمانی ہے

نمایاں آج گلشن میں بہار زندگانی ہے

اڑا دیں دھجیاں دامن کی اپنے جوش بہجت میں

چمن میں آج پھولوں کو بھی کتنی شادمانی ہے

اگر الفت نہ ہوتی زندگانی تلخ ہو جاتی

محبت ہی حقیقت میں بہار جاودانی ہے

سنیں گے آپ کب تک یہ فسانہ درد الفت کا

مرے ایام رفتہ کی بڑی لمبی کہانی ہے

اگر ہو ذوق الفت پھول بن جاتے ہیں کانٹے بھی

محبت سے جدھر دیکھو ادھر ہی شادمانی ہے

ہوئی جاتی ہے جب توسیع میعاد اسیری میں

اسیران قفس کو کیوں پھر اتنی شادمانی ہے

یہی دن ہیں نشاط انگیزیاں پھر کیوں نہ ہوں ان میں

مرادیں ہیں امنگیں ہیں خدا رکھے جوانی ہے

مصائب میں گلوں سے کوئی سیکھے شادماں رہنا

گریباں چاک ہونے پر بھی کتنی شادمانی ہے

نہ گھبرانا مصائب میں ذکیؔ موج حوادث سے

ارے ناداں مجاہد کی یہی تو زندگانی ہے